Претставникот на ОБСЕ за слобода на медиумите ја поздравува одлуката на властите во Скопје да ја декриминализираат клеветата

ВИЕНА, 14 ноември 2012 – Претставникот на ОБСЕ за слобода на медиумите, Дуња Мијатовиќ, ја поздрави денес одлуката на владата и собранието во поранешната југословенска република Македонија да ја декриминализираат клеветата.

Како прв чекор во напорите за зајакнување на слободата на медиумите, собранието на 12 ноември го усвои новиот закон за граѓанска одговорност за навреда и клевета и ги отстрани санкциите за вакви дела од Кривичниот законик.

"Ова е храбар и многу потребен чекор од страна на властите да започнат да создаваат побезбедна и послободна работна средина за новинарите и медиумите, особено имајќи го предвид големиот број кривични случаи за клевета кои се во моментов во процедура пред судовите", изјави Мијатовиќ. "На новинарите мора да им биде овозможено да ги извршуваат своите работни задачи и да дебатираат за прашања од јавен интерес без да имаат страв од кривична санкција или граѓанска отштета без потреба."

Таа истакна дека земјата има преземено позитивни чекори, но предупреди дека уште многу мора да се направи за да се создаде вистински слободна средина за медиумите.

"Се надевам дека сега владата ќе се зафати со решавање на другите предизвици за слободата на медиумите, како што се медиумскиот плурализам, независноста на јавниот радиодифузен сервис и медиумскиот регулатор, како и за транспарентноста на медиумската сопственост", изјави Мијатовиќ.